分手要分得高明！

經常會聽到男生批評：「你哋啲女人，話分手就分手，好鐵石心腸囉！」老實講，任何事，做了決定，就應該撇撇脫脫，何必拖泥帶水呢？

成功分手的關鍵是要分得高明。只要做到幾個原則：肯定自己的抉擇、同對方講得清清楚楚、理性、唔好拖拖拉拉，咁樣你嘅task就可以圓滿結束。

有啲人分來分去都分唔到手，原因不外乎：

1. 根本未諗清楚。
2.  即使好肯定唔再鍾意對方，卻因為慣性依賴，變得欲斷難斷。
3. 分手時，對方死纏爛打，係咁挽留你，你覺得有優越感，於是採取拖字訣。

以上第3種最要不得，亦最容易令對方逐漸覺得你玩緊佢，如果佢一時轉牛角尖，可能會發生悲劇。而第1同第2種，都係因為無諗清楚，唔肯定自己想點。連自己都唔知自己想點，點叫人配合你？就好似要sell一樣嘢，你自己都唔信嗰樣嘢的話，sell出來又邊有說服力呢？