好唔好同曖昧男做朋友？

愛情其實好難黑白分明，所以每段關係裏亦有好多曖昧空間，而跟你藕斷絲連的前男友、無乜進展嘅心儀對象或者老友鬼鬼嘅死黨，都可以係曖昧地帶嘅男主角。你唔清楚你哋之間嘅關係，唯一能夠肯定的是：他不是你的男友。咁，你究竟應唔應該繼續同曖昧男糾纏下去呢？睇吓就知道﹗

曖昧男1號：你們曾開始過，但目前大家各自拍緊拖。

如果你哋曾經一齊，即係大家都曾經互相吸引，亦唔排除將來有機會再開始過，不過，你哋其中一個最終都可能會再受傷（否則點解會曾經分手呢？）。如果大家都100%肯定再沒有愛情感覺，那麼你和他應該可以做好朋友，加上你們各自有戀人，就更加無問題啦！

好友指數：6/10

曖昧男2號：佢知道你鍾意佢，但唔太想同你開始。

你鍾意佢但佢唔鍾意你，仲要同佢做朋友，成日聽埋佢同女友嘅事情，你得到的只會是傷心和傷心。最慘嘅係，佢會阻礙你找尋真正屬於你的男生，所以遠離佢吧！直到你搵到所愛，先同佢做返朋友都唔遲啦。

好友指數：1/10

曖昧男3號：你拒絕佢嘅追求，但你懷疑佢仍然鍾意你。

呢啲痴心男就算被你拒絕了，但暗地裏仍希望你有一日會改變主意。雖然，被裙下之臣擁戴的感覺很爽，但你都應該同佢哋保持距離，唔好同佢見得咁密，好等佢有時間找尋屬於他的女生。

好友指數：3/10

曖昧男4號：你哋互相有感覺，而且不時調情，但大家都好怕講出自己的感受。

你哋目前的關係已經好好，加上互相吸引的火花，其實好易將友情變成愛情。所以，你哋應該繼續保持親密關係，讓大家越來越信任對方，直到大家感到時機到了，就會搵到機會將關係提升到另一個層次。

好友指數：10/10