有男友，但愛上男友人……

我有一個一起3年多、體貼我的，仲幫我交埋學費（我而家讀碩士，未有自己收入），對我好到無得彈的男友，同時有一個識咗3年多的男性朋友。我記得我見佢第一眼嘅時候有一見鍾情的感覺，所以呢個男生一直喺我心裏有特別的感覺。

 

我同呢個男性朋友一直都有聯繫，平時會約出來食下飯，我哋會喺MSN度傾偈，我好喜歡同佢一齊的感覺。大家都係從事類似的職業，但以前我從來都無講佢聽我有男朋友，但我有同男朋友講我同呢個男性朋友食飯。呢個男性朋友在一個半月前失戀了，佢將佢以前嘅戀情通通同我講晒，仲講埋佢富二代前女友點睇佢唔起，意思係其實佢之前段感情好難受，但卻好愛佢前女友。於是我不斷安慰佢啦，仲主動同佢講電話，終於我同佢講我有一個3年多的男友，我哋關係點好點好啦，但慢慢我開始覺得佢喺MSN上講嘢的語氣變了，變得好曖昧，好似當我係佢女友咁，我覺得佢有D鍾意我。後來過咗兩個星期，佢特登喺外面嚟香港搵我，我哋一齊玩咗兩日（我有同男朋友講同男仔朋友玩，但無講係邊個），我覺得同佢一齊好開心，完全唔同同男友一齊嘅感覺，後來，佢返咗去，我開始好掛住佢，掛到瞓唔着。再後來，我同佢講：「我喜歡你，但我不能喜歡你」，佢覆我：「其實我也很喜歡你，而且我可以喜歡你」、「你有好多好吸引我的地方」、「成日三更半夜send SMS我想你想到瞓唔着」、「我想給你打電話」……

 

我真係又驚喜，又害怕，我哋日日都仲有喺聊天工具上傾計先唔會心掛掛，我覺得自己好衰，對唔住男友，我好驚男友知道，我知道我唔應該咁，但我又不能停止幻想佢，甚至我唔知道佢係咪當我係佢ex， 我覺得好痛苦。

 

唔該你幫下我。

 

AU

 

Dear AU:
 

其實你講了這麼多這位男性朋友有幾喜歡你、你有幾瞓唔着掛住他，都只不過是反映了你貪心，在愛情上想得一想二的性格。

 

由一開始你選擇不告訴男性朋友你有男朋友，暗地裏你已經萌了「希望睇下可唔可以跟他發展」的心態，加上你對他有一見鍾情的感覺，自然會對他有無限的浪漫幻想。
 

我想問你：

為甚麼當日不直接訴男性朋友你有男朋友？

是甚麼原因令你享受繼續跟男性朋友曖昧？

是甚麼原因令你選擇和男朋友一起？

你怎樣形容跟男朋友的關係？

既然你覺得男朋友無得彈，為甚麼不能對他專一呢？

其實你想要一段怎樣的愛情關係？

 

你應該怎樣做，並不取決於男性朋友是否對你有意思，而是你怎樣看現有的感情。

 

CG！們，如果你在生活上遇到甚麼疑難，包括工作、愛情、人際關係，總之生活上的任何事情，都歡迎e-mail到editorial@cosmogirl.com.hk 跟我分享及討論啊！:)（Subject: ask joven）