戒掉「機不離手」的壞習慣！

一出到街，你會發現大部分人時時刻刻都「機不離手」，我所指的「機」包括手機、平板電腦、遊戲機等，佢哋無論搭車、等人、食飯、行緊路……都係拎住部機係咁篤，多數都係打機、WhatsApp、睇Facebook、睇微博……嚴重啲嘅，仲會喺一大班人gathering，又或者係同家人男友食飯嗰時都仲篤緊！

我曾經試過同一班朋友出來食飯，當中只得朋友C唔係用智能手機，由於大家都習慣咗坐埋位就拎部手機出來玩，有啲就WhatsApp、有啲就研究有咩新Apps好玩，結果朋友C黑面，仲嬲爆爆話參與唔到我哋嘅話題，最後我哋梗係收返埋啲手機啦……

雖然嗰刻好無奈，但之後回想返呢件事，我發現原來機不離手的習慣，真係會不知不覺咁拉遠了人與人之間的距離！更甚者，仲會成為大家逃避的工具。例如：

· 在地鐵車廂內有位坐嘅人，見到有老人家或孕婦上車，會即刻繼續狂篤電話扮睇唔到，目的係唔想讓座；

· 喺街上見到有人賣旗，就會耷低頭篤電話扮睇唔到，直行直過。

其實成日機不離手，真係會令我們忽略了很多身邊的人和事，記住：呢啲電子產品只係我們生活中的一少部分，不應將大部分時間都花喺佢哋身上呀！CG!們，不如就趁新一年，戒掉這個機不離手的壞習慣吧！