放下你的無謂憂慮！

正所謂「人無遠慮必有近憂」，但過多無謂的擔心就好容易拖垮自己！

生活已經要面對不同的壓力，有好多亦係自己攞嚟，例如諗住趁大減價小瘋狂購物，卻唔覺意「使突咗」。於是在內疚之下，就開始想自己是否成了購物狂。當然，太無憂無慮亦不是一件好事，沒有危機意識就好容易出事。究竟在憂與不憂之間的界線係點呢？

諗得太多的確會傷身，負面思想會引起壓力病，包括偏頭痛、背痛、高血壓、抑鬱，結果是令自己的生活質素下降。其實只要客觀一點分析眼前事實，就知道甚麼可慮、甚麼情況不應憂。

無聊的憂：成日擔心自己使多咗錢
女人很奇怪，有時待自己好一點居然會覺得內疚。例如當收入不俗時，去剪個靚髮、做Spa，即使是自己能力能負擔，仍然覺得不應該。

解憂法：只要平時有理財習慣，即是收支平衡，略有積蓄(即是除了供強積金外，還有儲蓄的習慣)，戶口起碼有三個月以上的應急使費，又何需擔心呢？但當你身負巨債、要借快錢；或搵幾多使幾多甚至入不敷支，就要多加留意了。

無聊的憂：放假大時大節食多咗，工作玩樂忙得濟，唔得閒運動一兩星期就擔心身材會走樣。
有均衡飲食習慣，邊有咁易肥，其實休假過後精神更佳，運動嘅效果可能更好。

解憂法：都係嗰句，有運動習慣就不怕食得多，建議每星期做3次帶氧運動，或每天步行。但如果你太耐沒有跑出一身汗水，運動癮沒有出來，就可能表示你已放棄運動了。最好選擇能樂在其中的運動，循序漸進慢慢重拾箇中樂趣就可以持之以恆。

無聊的憂：我不能勝任目前的工作
你唔得就一早過唔到試用期啦！這種憂慮源自不安全感。其實打工不用過分追求完美，準時、交足功課便足夠，唔需要吓吓拿一百分。

真正需要擔憂的是：大project無你份，被派去做行行企企的工作，即係boss唔信你有能力。

無聊的憂：現在雖幸福，但總覺得不幸即將降臨
是的，人生中總會遇上壞事情，但成日向壞的方向想只會妨礙自己玩樂時的盡興。細心評估，意外發生的機會率是微乎其微。

無聊的憂：作了錯誤決定
人誰無過？別責怪自己。只要能從中反省，明白當時為何會作出這樣的決定，汲取教訓，承擔後果或作出補救便好。諗返轉頭都無用，向前看才是實際。